السلام عليكم ورحمة الله وبركاته
هذي طريقة كيكة ماما اللذيذة 😋 هي شكلها من الطريقة تطول بس ماما سوتها بسرعة تقريباً بنص ساعة.
المقادير:
•كوبين دقيق.
•3 بيضات.
•كوب ونص حليب.
•ربع كوب زيت.
•ملعقتين باكينق بودر.
•ملعقة صغيرة فانيليا.
•ملعقة كاكاو.
•كاس سكر.
•2 دريم ويب.
الطريقة:
● نسخن الفرن 180 درجة قبل نبدأ بالكيكة.
● البيض والسكر والفانيليا ينضرب بالخلاط لين يصير لونه أبيض بعدين نضيف عليه الزيت والحليب وينضرب.
● ننخل الدقيق والباكينق بودر بوعاء ونصب عليه الخليط ونضربه بالخفاقة اليدوية او الكهربائية نخلطه جيداً وباتجاه واحد (لكي لا يخرج الهواء من الكيكة).
● ناخذ مقدار نص كوب من الخليط ونضع عليه ملعقتين شوكولاته بودرة ونخفقه.
● بعدين نحط الخليط الاصفر بوعاء الخبز ونحط نص كوب الشوكولاته من فوق بشكل عشوائي وندخله الفرن لمدة نص ساعة ويمكن أقل.
● بعد ما تنضج أغرس فيها عود وأخرمها كلها من فوق بمسافات متباعدة وأخذ كوب حليب مذاب فيه ملعقتين نسكافية واسقي به الكيكة بعدين اخليها تبرد شوي
● أسوي الدريم ويب (نفس الطريقة اللي على المغلف) وأحطه على الكيكة وأبردها بالثلاجة.
● طريقة صوص الشوكولاته: ملعقتين كبار كاكاو ملعقتين سكر وملعقة صغيرة نشا وكوب حليب و200 غرام شوكولاته هيرشي أو أي شوكولاته لوح ، وعلى النار شوي بعدين إذا ثقلت صبيها ع الكيكة، وحركيها بعود من فوق عشان يطلع شكل رخامي، وتتبرد
وبالعافية💕.
السلام عليكم ورحمة الله وبركاته
لا تغركم قل المكونات لذييييييذ مره عجبني😋💖
الشوكولاتة اللي استخدمتها اسمها ريحان ، بس عادي أي شوكلاته بودرة تنفع
المقادير:
علبة قشطة
دريم ويب
ملعقتين حليب بودرة محموس
ملعقة شوكولاته بودرة
باكيت بسكويت شاي
شوي حليب
الطريقة:
• نغمس البسكويت بالحليب ونصفه صفين.
• نحط باقي المكونات بالخلاط ونحطها فوق البسكويت، للتزيين شوي فوق اوريو .
وبالعافيه💕.
السلام عليكم ورحمة الله وبركاته
مدري شفيني من ست شهور ماسويت حلى لا ويمكن أكثر ، وذا الأسبوع ذي 3 مره، إذا طحت بشيء أطيح فيه😂💔 المهم هذا الحلى مررره سهل وسريع ومقاديره قليلة بعد (أهم شيء بالحلى عشان تقل السعرات👀 وأكل بدون تأنيب ضمير) ااااه يازمن اللي أكب فيه وما أهتم بالسعرات💔
المقادير:
باكيت بسكويت شاي
علبتين قشطة
ظرف دريم ويب
6 جبن كيري
ربع أو نص علبة حليب المكثف المحلى
2 اوريو (أو إذا مالقيتو حطو بداله فليك أو جالكسي).
الطريقة:
•نحط الجبن كيري والدريم ويب والحليب المكثف المحلى وملعقتين من القشطة والكريمة "اللي تكون جوا الأوريو" بالخلاط.
•بسكويت الشاي نطحنه ونخلطه مع الباقي من القشطة (علبة ونص تقريباً).
•نطحن الاوريو.
•بعدين بصحن الحلى أول شيء نحط البسكويت بعدين شوي من الأوريو المطحون بعدين من اللي سويناه بالخلاط "الجبن ووو" بعدين نحط فوق أوريو وبس بالعافية💕.
السلام عليكم ورحمة الله وبركاته
اليوم سويت بسبوسة باللوتس، أمس حلى اللوتس واليوم بسبوسة اللوتس واضح أني طايحة باللوتس على رأسي😂 أول مره أسوي بسبوسة بس طعمها الحمدلله طلع لزيز👍💕
*لو ما عندكم زبدة اللوتس استبدلوه بنوتيلا أتوقع يضبط🤔*
المقادير:
• 3ملاعق زبدة اللوتس.
• ملعقة باكينج بودر
• علبة قشطة (نفس مقاس العلبة باقي المقادير).
• حليب بودرة.
• سميد.
• ربع العلبة سكر.
• ربع العلبة زيت وزدت عليه مويا لين ملىء العلبة.
• ربع بسكويت شاي مطحون (تقريباً7 بسكويتات)
الطريقة:
• نخلط كل شيء مع بعض، ونحطه بقوالب صغيرة وندخله للفرن من تحت 15 دقيقة على درجة 160 أو 180 وبعدين من فوق 4 دقايق ونطلعه من الفرن.
• إذا خلص نحط عليه شوي زبدة اللوتس المذوبة وحليب مكثف محلى
وبالعافية💕.
اللهم أغفر لأمي وأرحمها وأرضى عنها وأطل عمرها وأدخلها الفردوس من غير حساب ولا سابق عذاب.
السلام عليكم ورحمة الله وبركاته
كل ما دورت حلى باللوتس تطلع الطريقة مره صعبة وطبقات وخطوات كثيييرة💔 فأسحب بس قبل كم يوم لقيت ذي الطريقة ل ذ ي ذ ة👌 بس هذيك كانت مره حقتها دسمة فغيرت بعض الأشياء
*الكمية تكفي تقريباً 6 كاسات صغار*
المكونات:
• علبتين قشطة
• ٣ملاعق زبدة اللوتس
• باكيت بسكويت شاي
• ملعقتين من الحليب المكثف المحلى (أو أكثر إذا تحبونه حالي وماتهمكم السعرات).
• ظرف دريم ويب
• 6 جبن كيري
الطريقة:
• نحط كل شيء بالخلاط، ماعدا علبة وحده من القشطة والبسكويت.
• نكسر البسكويت ناعم ونخلطه مع القشطة ونحطه بالصحن، بعدين نحط فوقه من اللي بالخلاط ونزينة زي ما نحب (أنا حاطه فوقه بسكويت مكسر بس مو مبين مره بالتصوير) والسلام عليككككوو
شايفين السهوله كيف😂
وبالعافية💕.
السلام عليكم ورحمة الله وبركاته
عشان أغير عن المكرونة التقليدية جربت أحط معها ذرة وضبط 👌 حلو كتغيير مع أني مو من محبين الذرة
المقادير:
مكرونة
صدور دجاج
بقدونس
ذرة معلبة
حليب
دقيق
الطريقة:
نسلق المكرونة 15 دقيقة مع ملح وشوي بهارات
ونقطع صدور الدجاج شرايح ونطبخهم مع ملح وفلفل وشوي زنجبيل مطحون
إذا خلصو نسوي البشاميل تقريباً 3 ملاعق دقيق مع كوب وشوي حليب ونحرك على النار لين تثقل بعدين نحط عليه شوي جبن مبشور ونحرك بعدين نحط عليه الذرة والمكرونة والبقدونس ونحرك بعدين نحطه بصحن وعليه الدجاج وشوي جبن مبشور وندخله الفرن لين يذوب الجبن وبالعافية💕.
السلام عليكم ورحمة الله وبركاته
هذي الساندوتش لها حكاية😂 رحت للمخبز القريب من بيتنا وما لقيت فيه إلا خبز صامولي، مخلص خبز البرقر الصغير
فشريت الصامولي وقطعت أطرافه وخليته كأنه خبز البرقر الصغير أما اللي بالنص حطيت فيه النقانق اللي صورتها قبل 😂💔 يقولون الحاجة أم الاختراع
الطريقة:
لحم مفروم قطعت عليه بصلة صغيرة مع ملح وفلفل وبودرة الثوم وكمون وسويته دوائر صغيرة
شلت العجين اللي جوا الخبز وخليته على قد حجم اللحم
وخلطت بصحن بيضة مع شوي بقدونس مع رشة ملح وفلفل أسود ودهنت فيه الخبز من جوا (بس شوي مسحه يعني)
بعدين فوقه شوي جبن تشيدر ودخلته الفرن لين تحمر الخبز وذاب الجبن شوي بعدين طلعته من الفرن وحطيت عليه صلصة الثوم(تقدرون تستغنون عن الصلصة مب لازم) بعدين اللحم وفوقها أي صوص أحمر بعدين فوق شوي موزريلا (أنا حطيت شوي جبن تقدرون تكثرون حسب الرغبة)
بالعافية💕.
