طريقة لزانيا سهله ولذيذة مره مره

5:32 ص ايرزا 0 تعليقات

السلام عليكم ورحمة الله وبركاته
هذي طريقة لازانيا سويتها قريب لأول مره رهيييييبه🖒ولذيذة مره مره 😋 وسهله بس متعبة شوي😅
(الطريقة أخذتها من وحده بس غيرت فيها بعض الأشياء وحذفت بعض الأشياء اللي مالها داعي وقللت بعض الأشياء كالعادة مستحيل اسوي وصفة نفس ماهي😂 أمنيتي أسوي شيء نفس ماهو مكتوب)

الطريقة:
تطبخين الدجاج مع بصلة صغيرة على النار مع البهارات (أنا حطيت بودرة الثوم وملح وفلفل وكمون وكركم) بعدين إذا خلصت طابخه حطيت عليها ملعقة صغيرة صلصة طماطم وملعقتين صلصة ماكرونة.

بعدين أنا سويت المكرونة بعدين الباشاميل وهذا غلط علي المفروض أطبخ الدجاج وأسوي الباشميل بعدين اللزانيا عشان ما تتلصق ببعض، وعشانها تنطبخ بسرعة بعد ما تأخذ 8 دقايق، بس يالله أي شيء تسوينه أول مره طبيعي يكون فيه أخطاء😂(وحده تهون ع نفسها)

بعدين الباشميل 3 أكواب ماء و6 ملاعق حليب بودرة و6 ملاعق جبن سايل و6 ملاعق دقيق وملح وفلفل أسود وحركي لين يصير قوامه ثقيل "تقدرين تقللين كمية الملاعق لأني اتبعت طريقة وحده والصراحة لذيذة بس السعرات الحرارية بتكون كثيرة💔 فالمره الجايه بقلل الكمية للنص "

بعدين أسلقي المكرونة مع شوي زيت بقدر يكون كبير عشان ما تتلصق ببعض تقريباً تخلص ب 8 دقايق.

بعدين خوذي صحن كبير وحطي صوص الباشميل بعدين اللزانيا غطي فيها الصحن بعدين الدجاج وفوقه الباشميل وفوقه لزانيا مره ثانية لين تخلص الكمية واخر طبقة تكون مكرونة بعدين باشميل وفوقه جبنة موزريلا وتتحمر من فوق.
وبالعافية💕.

رأيي بكتاب: أغنى رجل في بابل لجورج كلاسون

9:33 ص ايرزا 0 تعليقات

السلام عليكم ورحمة الله وبركاته
قريت هذا الكتاب "أغنى رجل في بابل" قبل فترة وبصراحة الكتاب جميل ومفيد بس فيه شيء واحد ما أعجبني، أسلوب السرد نفس القصة وكل قصة تطلع منها قصة هو حلو يعني الأسلوب بس كذا بنص الكتاب أصابني الملل🙄💔 بس بشكل عام الكتاب جميييل أنصحكم فيه💖.

بعض الاشياء اللي أستفدتها من الكتاب:

• طبيعة بابل خليط من الفخامة والقذارة ، الثراء الفاحش والفقر الأليم.

• أن ازدهار أي دولة يعتمد على الازدهار المالي لكل شخص فيها.

"أن المال ينفد مالم يكن له مورد مالي"

• مهما كانت ايراداتك المالية يجب أن تدخر العشر.

• لا أنفق أكثر من سبعة أعشار ايراداتي على الأغراض المهمة والاستمتاع بالحياة.

• النصيحة لا تطلب إلا من المؤهلين من خلال خبرتهم وليس كل أحد، مثلاً لو بسأل عن الأغنام اسأل  راعي الأغنام.

•لو كان عليك دين تبقي عشر للادخار و7 أعشار تصرفها على نفسك وعايلتك ويبقى عُشرين ترجعهم لصاحب الدين لأنك لو جلست ترجع(تعطي كل اللي تكسبه لصاحب الدين) بدون تخطيط ولا تصرف على نفسك بتحتاج تتدين من شخص أخر مثلاً وبتتزايد الديون بدال ما تقل💔 فالتخطيط شيء مهم🖒.

وفيه قصة مره عجبتني حقت الثور مدري البقرة بس الظاهر أنه ثور مع الحمار القصة حقتهم جميلة وفيها عبرة😂😭 حسيتها موجهه لي أنا مب قايلتها عشان ما أخرب عليكم اقرؤها.

ملاحظة: عدد الصفحات 160 تقريباً، في أحد الصفحات كان محطوط شعار الماسونية مع أن الكتاب يخلو من الصور! ما أدري إذا مقصود ذا الشيء أو لا.

طريقة جيب التاجر سهله وسريعة

8:38 ص ايرزا 0 تعليقات

السلام عليكم ورحمة الله وبركاته
هذي الطريقة لازم نسويها بكل رمضان مررره لذيذة وما تأخذ وقت😋❤❤

الطريقة:
خبز مفرود صغير من المخبز.
لحم مفروم حطيت عليه نص ملعقة بودرة الثوم  ملح وفلفل أسود وكمون وبصلة صغيرة بعدين شكليه ع شكل دوائر بعدين أضغطيها مع النص(يصير نفس البرقر) ودخليها الفرن من تحت وإذا تحمر شوي أقلبيه على الجهه الثانية بعدين إذا طلعتيه من الفرن حطي عليه جبن شرائح مع شرائح طماطم وخيار وحطيه بخبز وبس أسهل من كذا ما فيه.
وبالعافية💖.